Skaðleg áhrif kristilegs siðgæðis

Þegar notast er við vonlausa hugmyndafræði til að takast á við vandamálin, þá er ekki nema von að árangurinn verði eftir því. Niðurstöður þessarar skýrslu, sem fjallað er um í þessari frétt, sýna svart á hvítu að ýmsir trúarhópar standa í vegi þeirra sem vilja stöðva útbreiðslu kynsjúkdóma og auka aðgengi fólks að getnaðarvörnum. Þar er páfinn í Róm fremstur meðal jafningja eins og fyrri daginn.

Heimskulegir fordómar gegn smokkanotkun eða öðrum getnaðarvörnum leiða einungis til þess að kynsjúkdómar grassera, sérstaklega í þróunarlöndunum. Það kemur einnig fram í fréttinni að 70.000 konur deyja árlega vegna ólöglegra fóstureyðinga, dauðsföll sem koma mætti auðveldlega í veg fyrir ef ekki væri fyrir áróður og áhrif kirkjunnar manna í Páfagarði og víðar. Manna sem margir hverjir, líkt og kaþólskir klerkar og páfinn sjálfur, hafa aldrei við konu kenndir og eiga engin börn sjálfir. Sér enginn hræsnina sem hér er á ferð?

Á síðasta ári var sýnd frétt í fréttaþættinum 60 Mínútur þar sem rætt var við Peter Bearman, prófessor í félagsfræði við Kólumbíuháskóla sem gerði ítarlega rannsókn á kynheilbrigði ungs fólks í Bandaríkjunum. Þar tók hann saman gögn um 20.000 ungmenni sem höfðu strengt svokallað skírlífisheit, í anda kristinna siðapostula. Niðurstöðurnar voru í stuttu máli þær að þetta skírlífisheit leiddi einfaldlega til þess að fólk stundaði óöruggara kynlíf og 88% rufu heitið á endanum.

Vonandi fara menn að sjá að sér í þessum málum og fari að styðja við bak þeirra sem beita sér fyrir raunhæfum aðgerðum gegn útbreiðslu kynsjúkdóma í stað þess að lifa í útóbískri heimsmynd sem er í engum tengslum við veruleikann.

Páfagarður og íhaldssamir trúarhópar í Bandaríkjunum sagðir hamla öruggu kynlífi

Íslendingar eru vantrúaðri á tilvist himnaríkis en Svisslendingar

Mogginn slær upp þessari frétt undir þeirri fyrirsögn að Svisslendingar trúi ekki lengur á tilvist himnaríkis. Sama hlýtur að eiga við um Íslendinga þar sem einungis 8.1% þeirra segjast trúa því að maðurinn rísi upp til samfélags við guð. Þetta kom fram m.a. í frétt hér á mbl.is og var fjallað um þetta fyrr á þessu ári á Vantrú.is.

Það er ánægjuleg þróun sem á sér stað í Evrópu um þessar mundir og vonandi heldur hún áfram á þessari braut.

Svisslendingar trúa ekki lengur á tilvist himnaríkis

Breytt heimsmynd kaþólskra

Nú hafa "sérfræðingar" Páfagarðs komist að þeirri djúpvitru niðurstöðu að líklega er Limbó ekki til. Hlýtur að vera undarlegt að lifa í þessum ævintýraheimi kaþólskunnar þar sem menn skálda upp veruleikann eftir hentisemi. Hvernig ætli "sérfræðingarnir" hafi komist að þessari niðurstöðu? Líklega hafa þeir lesið í gömlum skruddum eftir aðra "sérfræðinga" og túlkað þær upp á nýtt, ef ég þekki þessa mennsku steingervinga rétt. 

Páfagarður íhugar að leggja niður ,,limbó"

Fórnað á altari trúarinnar

Það er athyglisvert að velta því fyrir sér hvað fær fullorðna menn til að höggva niður fíkjutré vegna orðróms um að það hafi haft yfirnáttúrulega krafta. Svona menn hafa stundum verið kallaðir ömmumúslimar, vegna þess hversu nærri sér þeir taka allt sem gæti móðgað trú þeirra.

Hjuggu niður 100 ára gamalt tré vegna meintra ofurkrafta þess

Krosslausi fáninn

En allavega höfðu Grænlendingar vit á að sleppa krossinum úr fána sínum.  Það er aðdáunarvert.

Minnir á ljóð sem Helgi Hóseasson skrifaði um málið: Já, - sko þá! 

Segir grænlenska fánann virðast ættaðan frá dönskum siglingaklúbbi

Áskorun til alþingismanna

Í tilefni af setningu Alþingis hefur Vantrú sent þingmönnum áskorun þess efnis að þeir sniðgangi hina hefðbundnu guðsþjónustu við upphaf þingsetningar.

Alþingi sett

Hjálpaði páfinn við að hylma yfir með barnaníðingum?

Breska ríkissjónvarpið BBC er þekkt af góðu einu fyrir vandaðar heimildamyndir sínar. Nú hafa þeir upplýst um hlut Benedikts páfa í því að hylma yfir kynferðisbrot kaþólskra presta gegn börnum. Barnaníð er einhver sá viðbjóðslegasti glæpur sem hægt er að fremja og hefur lagt líf fjölmargra í rúst. Að æðstu menn innan kaþólsku kirkjunnar séu í samkrulli við að fela glæpi hjá barnaníðingum innan kirkjunnar er grafalvarlegt.

Það var kannski ástæða fyrir því að hann bað til guðs um að vera ekki kjörinn páfi, með þessa fortíð á bakinu.

Saka BBC um „fordómafulla atlögu“ að Benedikt páfa

Siðlausir prestar

Oft er sagt að trú sé forsenda góðs siðferðis. Ótal mörg dæmi eru þó um að trúin sé brigðul í þeim efnum, eins og svo mörgu öðru. Gott dæmi um það má sjá hjá þessum kaþólsku prestum í Bandaríkjunum sem rændu stórfé frá sjóði í eigu sóknarbarna sinna. Það bætir ekki úr skák að þeir eyddu fénu í fjárhættuspil!

Það er nokkuð augljóst að trú er engin trygging fyrir góðu siðferði nema síður sé og trúað fólk er ekkert betra fólk en trúlaust fólk.

Þjófóttir klerkar í klípu; einn situr í varðhaldi á meðan annar er á flótta