Hvað er málið?

Í fyrsta lagi, af hverju er þetta frétt?  Þjófnaður á Biblíu og sálmabók getur varla talist stórglæpur í dag - jafnvel ekki einu sinni smáglæpur.  Hér eru svo nokkrir bloggarar afskaplega hneykslaðir yfir því að stolið sé úr kirkju, eins og það sé eitthvað verra en að stela t.d. úr skóla eða matvöruverslun!   Kirkja er bara fyrirtæki.  Þarna vinnur hálaunafólk við að boða hindurvitni á kostnað skattgreiðenda.

Í öðru lagi, þá eru eignir kirkjunnar gríðarlega miklar - hvernig eignaðist kirkjan allan þennan auð?  Voru þessir blessuðu menn ekki bara í fullum rétti, eiga þeir ekki þessar bækur í raun?  Hvernig stendur á því að Þjóðkirkjan eignaðist allar þessar jarðir?  Var þetta ekki eign Kaþólsku kirkjunnar.  Spurningin er: Hver á kirkjujarðirnar?

Í þriðja lagi.  Þurfti virkilega tvo lögreglumenn á fullu kaupi til að afhenda tvær bækur?  Svo kemur fram í fréttinni að lögreglumennirnir sátu bænastund í vinnunni - á launum hjá skattgreiðendum!  Er ekki verið að gera grín að okkur?  Þeir hljóta að hafa stimplað sig út.   Þetta verður væntanlega dregið af launum þeirra. 

Vantrú.is

(ef þessi skrif fara óskaplega í taugarnar á ykkur bendum við á spjallborðið á Vantrú, þar getið þið skammað okkur að vild)

Stálu biblíu og sálmabók úr kirkju

Að gefnu tilefni - athugasemdir

Einhverjir trúarnöttarar hér á Moggabloggi hafa vakið athygli á því að ekki er hægt að kommenta á Moggabloggsíðu Vantrúar.  Athugasemd Vantrúarsinna sem svaraði var eytt en hana er hægt að lesa á bloggsíðu hans.

Ástæðan fyrir því að ekki er opið fyrir athugasemdir hér er einföld, þetta er aukasíða Vantrúar. Tilgangurinn með þessari síðu er að geta kommentað við fréttir og vísað á ítarefni á Vantrúarvefnum.  Það væri afskaplega óhentugt fyrir okkur að rökræða efni greina á mörgum mismunandi stöðum.

Opið er fyrir athugasemdir á Vantrúarvefnum auk þess að allir geta skráð sig á Vantrúarspjallið og tjáð sig þar.

Við hvetjum fólk til að gera athugasemdir á Vantrú.  Eina skilyrðið er að fólk noti löglegt póstfang og að athugasemdir tengist efni greinarinnar eða umræðunni sem í gangi er - ef fólk vill ræða eitthvað allt annað stendur því til boða að opna þráð á spjallinu.

Vantrú.is

Kabbala komið til Íslands

Í grein dagsins á Vantrú, Költ gerir strandhögg, er fjallað um tilraunir Kabbala-safnaðarins til þess að nema land á Íslandi. Kabbalah hefur helst komist í fréttirnar í tengslum við stöllurnar Madonnu og Britney Spears en sú fyrrnefnda hefur tekið dyggan þátt í safnaðarstarfinu. Þessu költi hefur vaxið ört fiskur um hrygg á síðustu 20 árum og nú eru kabbalistar farnir að standa fyrir kynningarfundum hér á landi. Árangurinn virðist (sem betur fer!) ætla að láta á sér standa.

Fundur sem kemur kristni ekkert við

Það er ljóst að almenn þekking á sagnfræði er ekki mikil á Moggablogginu (né hjá Mogganum).  Heródes sem þarna um ræðir er sá sem er kallaður mikli. Í allt voru alla vega 8 Heródesar konungar á svæðinu þannig að titillinn konungur segir okkur ekkert um manninn.  Mogginn segir "Heródes komst til valda í hinu helga landi er Rómverjar gerðu það að skattríki sínu um 74 fyrir Krist."  Þetta er mjög vafasöm setning sem gefur í skyn að Heródes hafi orðið konungur árið 74.  Það er bara fjarri sanni enda fæddist maðurinn líklega um árið 73.  Heródes varð konungur með umboð Rómverja frá árinu 37 fyrir upphaf tímatals okkar.

Eyþór Arnalds sýnir að hann veit væntanlega ekkert um Heródes umfram það sem fram kemur í fréttinni.  Hann segir að "[þ]etta [sé] afar merkur fundur [...]. Það er með ólíkindum að þetta geti fundist svona 2070+ árum síðar."  Heródes mikli dó um 3-4 árum fyrir upphaf tímatals okkar þannig að við erum að tala um rétt um 2010 ár (miðað við að Heródes hafi farið í gröfina strax eftir andlátið).  Merkilegra er þó að Eyþór, eins og Snorri í Betel, heldur að þetta styrki á einhvern hátt sögulegan bakgrunn Nýja testamentisins.  Slíkt er augljóslega fáránlegt.  Það er erfitt að finna nokkurn konung gyðinga sem við vitum meira um heldur en Heródes mikla.  Sérstaklega mikið er fjallað um Heródes í ritum Jósefusar Flavíusar.  Það væri afrek að finna nokkurn sem hafi einhvern tímann efast um tilvist Heródesar mikla.

Heródes mikli á að vera sá konungur sem fyrirskipaði um að öll sveinbörn í Betlehem yrðu drepin.  Ef fjöldagröf (eða margar grafir frá sama tíma) með myrtum börnum myndi finnast á þessu slóðum þá væri það til þess að styðja sögur Nýja testamentisins.  Það er hins vegar einfaldlega þannig að þessi saga er uppspuni, byggður á sögum af því hvernig faró í Eygptalandi lét drepa sveinbörn gyðinga.

Þetta er að sjálfssögðu merkur fundur en hann kemur kristni ekkert við.

Þessa færslu er líka hægt að lesa á Vantrú og þar getur hver sem er sett inn athugasemd. 

Við mælum með þessu bloggi um málið.

Þessu tengt á Vantrú:

Var Jesús til?

Reis Jesús virkilega upp frá dauðum? 

Vantrú.is 

Gröf Heródesar fundin

Vatnssölukerling fær viðurkenningu heilbrigðisyfirvalda

Nýju lögin um hina svokölluðu "græðara" eru mikil afturför fyrir íslenskt heilbrigðiskerfi. Þarna hafa bakdyrnar verið opnaðar inn í kerfið fyrir alls kyns kuklara og skottulækna svo að þeir geti í krafti hefðarinnar stundað sín hjáfræði án þess að þurfa að sýna fram á gagnsemi eða virkni þeirra. Hvernig eiga þessir meintu "græðarar" að stuðla að bættri heilbrigðisþjónustu?

Það er viðeigandi að hómópati taki við fyrsta skírteininu þess efnis að nú stundi hann sitt kukl undir vottun ríkisins. Hómópatía er ein af vinsælustu greinum óhefðbundinna lækninga en rannsóknir hafa ítrekað sýnt að nákvæmlega ekkert er á þeim að græða, sjá ítarlega umfjöllun hér. Þær byggjast einfaldlega á því að gefa fólki vatnssopa við hverju því sem hrjáir það. Nánar tiltekið þynningar af hinum ýmsu efnum eins og brennisteini eða bleki úr blekfiskum en þessar þynningar eru oftast svo útþynntar að varla er eftir ein einasta sameind af upphaflega efninu sem þynnt var út.

Ekki er glæsilegur listinn yfir félögin sem hafa fengið skráningu sem félög "græðara". Þarna má t.d. finna Svæðameðferðarfélag Íslands en meðlimir þess trúa því að fótanudd sem þeir kalla svæðanudd sé allra meina bót. Fleiri nuddfélög eru líka þarna á meðal en þó að nudd geti verið þægilegt og slakandi þá má efast um að allir nuddarar eigi heima innan heilbrigðiskerfisins.

Það er hægt að spyrja sig hvernig farið er að því að velja þá úr sem eiga að teljast til græðara. Mega þeir sem reka illa anda út úr fólki vera með í þessum félagsskap? Ef ekki þá hvers vegna? Hvernig er það metið hvaða skottulækningar eru góðar og gildar og hverjar ekki? Það hefur verið sýnt fram á gagnsleysi smáskammtalækninga með vísindalegum tilraunum en það hefur greinilega ekki dugað til.

Að sumu leiti eru "græðarar" réttnefni á þessum félagsskap. Þeir eiga eftir að græða stórar upphæðir á því fólki sem leitar til þeirra, það er alveg bókað. 

Fyrsti græðarinn fær skráningu

Eyrnakerti og annað kjaftæði

Hver trúir því að fullorðið fólk á 21.öldinni setji kerti í eyrað á sér og kveiki svo á?  Þetta gerist nú samt!

Biskup túlkar gagnrýni á kirkjuna sem staðfestingu á því að hún sé að gera eitthvað rétt!  Er maðurinn galinn? (uh, já)  Vantrúaráróðurinn er rétt að byrja.

Þetta og margt fleira á Vantrúvefnum.

Vantrú.is

Biskupinn sannspár

Biskup sagði hafís trúleysisins lóna fyrir landi og nú er komið á daginn að hann hafði rétt fyrir sér. Ískaldir, gráðugir og siðlausir eru trúleysisflokkar okkar að nálgast landið og bíða færis að stökkva í land og taka trúmenn landsins til fanga. Reynið að flýja, þið fáið ekki dulist!

Hafís nálgast landið

Reis Jesús virkilega frá dauðum?

Á Vantrúarefnum í dag er þýðing á grein eftir fyrrverandi bókstafstrúarmanninn og farandpredikarann Dan Barker. Greinin heitir Reis Jesús virkilega frá dauðum? Í greininni er margt áhugavert, svo sem umfjöllun um svokallað Pétursguðspjall og hugsanlega andlega upprisu Jesú.

Bingó á Austurvelli klukkan 14:00 í dag

Vantrú stendur fyrir bingói á Austurvelli kl. 14:00 í dag.

Tekið verður við áheitum og allur ágóði rennur til góðgerðarmála.

Sjá einnig á Vantrúarvefnum.

Munum...

... að Gunnar í Krossinum býður sálsjúku fólki upp á að reka út illa anda.

 

... að prestar Þjóðkirkjunnar bjóða margir hverjir upp á draugaútrekstur.

 

... að hómópatar, höfuðbeina- og spjaldhryggsfólk, heilarar, reikimeistarar og allra handa nýaldarkuklarar segja meðferðir sínar vinna bug á ýmsum hættulegum sjúkdómum og koma þannig jafnvel í veg fyrir að fólk leiti sér almennilegrar læknisaðstoðar.

 

... að Gunnar í Krossinum flytur inn kraftaverkalækningahyski sem þykist lækna alvarlega sjúkdóma og skaðar þannig jafnvel fárveikt fólk.

 

Trúarbrögðin skaðleg? Hvað haldið þið? 

Trúa því að fjallalækur geri meira gagn en lyf gegn HIV-veirunni